Goranboy rayon İcra Hakimiyyətinin başçısı Nizaməddin Quliyevin adı növbəti qalmaqala qarışıb.

Demək olar ki, Goranboy rayonu mediada ən çox tənqid olunan rayonlardan biridir. Bunun da bəlli obyektiv və subyektiv səbəbləri var. Məsələ burasındadır ki, rayonda ciddi şəkildə xaotik mühit hökm sürür. Əhali məmur özbaşınalığından təngə gəlib, sahibkarlar intihar həddinə çatmaqdadırlar. Pambıq planını doldura bilməyən başçı faktiki yığılan məhsulu yandırması ölkədə ciddi təşvişə səbəb olmuşdu.

Bu arada Nizaməddin Quliyevlə bağlı daha bir qalmaqallı xəbər yayılıb. "Qaynarinfo" 7news.az-a istinadən xəbər verir ki, icra başçısı özünə Naftalanda sanatoriya inşa etdirir. İnşaatda lazım olan tikinti materiallarını isə başçısı olduğu rayondan sökdürərək apartdırır.

Məsələnin heyrətləndirici tərəfi ondan ibarətdir ki, vaxtilə prezident İlham Əliyevin açılışını etdiyi rayon stadionu indi hissə-hissə sökülərək başçısnın Naftalanada yeni inşa edilən sanatoriyasına aparılır. Bir sözlə, Nizaməddin Quliyev dövlət büdcəsi hesabına inşa edilən bir məkanı vəzifə səlahiyyətlərindən sui-istifadə edərək öz şəxsi maraqlarına "xərcləyir”.

Stadionun son görüntülərini təqdime edirik.