Qazax rayonunda 1994-cü il təvəllüdlü Raul (adlar şərti verilib – red.) həmkəndlisi Səidəyə təcavüz edib.

Teleqraf.com-un xəbərinə görə, Raul Qarapapaq kənd sakini Vəlinin onunla və ailə üzvləri ilə nalayiq hərəkətlər etməsi barədə həmkəndliləri arasında xoşagəlməz söhbətlər eşidib.

O, söz-söhbətin kənd camaatı arasında onu nüfuzdan salmasına əsəbiləşərək qisas niyyəti ilə Vəlinin arvadı Səidəni zorlamaq qərarına gəlib.

Gecəyarısı zorlamaya cəhd

Bu məqsədlə Raul 30 dekabr 2020-ci ildə gecə saat 1 radələrində Vəlinin Rusiyada olmasından istifadə edərək onun atasına məxsus Qarapapaq kəndindəki ikimərtəbəli evinə gəlib. Yataq otağında yatan Vəlinin 1984-cü il təvəllüdlü arvadı Səidəni yuxudan oyadaraq onunla cinsi əlaqədə olacağını deyib.

Qadının qışqıraraq evdə yaşayanları köməyə çağırması və müqavimət göstərməsinin qarşısını almaqdan ötrü fiziki zor tətbiq edib, əli ilə onun ağzını bağlayıb, zorla cinsi əlaqədə olmağa çalışıb.

Səidə Raulu özündən kənarlaşdırıb, səs-küy salaraq köməyə adam çağırmaq istəyib. Raul Səidəni əli ilə vuraraq ona bədən xəsarətləri yetirib, sonra cinsi əlaqədə olmaq niyyətini davam etdirib.

Qadın ona yenə müqavimət göstərib və Raulun əlindən çıxaraq qonşu otağa qaçıb. Səidənin otaqdan qaçdığını görən Raul pəncərədən küçəyə tullanaraq aradan çıxıb.

İki maddəli cinayət işi

İstintaq orqanı tərəfindən Raulun barəsində Cinayət Məcəlləsinin 29,149.1-ci (zorlama, yəni zərərçəkmiş şəxsə və ya başqa şəxslərə qarşı zor tətbiq etməklə və ya belə zor tətbiq etmə hədəsi ilə və ya zərərçəkmiş şəxsin köməksiz vəziyyətindən istifadə etməklə onunla cinsi əlaqədə olmağa cəhd) və 157.1-ci (Azərbaycan Respublikasının qanunları ilə müəyyən edilmiş əsaslar olmadan, mənzildə yaşayanın iradəsi ziddinə mənzilə daxil olma) maddələri ilə ittiham elan edilib.

“Anamla, bacımla cinsi əlaqədə olması barədə danışıb”

Cinayət işi üzrə təqsirləndirilən şəxs qismində ifadə verən Raul ittiham üzrə özünü təqsirli bilib. O bildirib ki, anası və nənəsi ilə birlikdə Qazax rayonu, Qarapapaq kəndində yaşayır:

“Üç ildir pul qazanmaq məqsədilə Türkiyəyə getmişəm, orada usta işləyərək ailəmin dolanmasına kömək etmişəm. İstanbul şəhərində mənimlə birlikdə işləyən tanışım və həmkəndlim Vəlinin haqqımda kənd əhalisi içərisində nalayiq ifadələr işlətdiyi, guya mən uşaq olanda onunla oral sekslə məşğul olduğumu, bir neçə il əvvəl isə anam və bacıma qarşı nalayiq ifadələr işlətdiyini, onlarla guya cinsi əlaqədə olması barədə danışdığını öyrəndim.

Əvvəllər kənddə olarkən də bu barədə eşitmişdim. Özümü başa düşəndən təxminən 5-6 yaşlarında Vəlinin mənə qarşı bu cür hərəkətlər etdiyini tam olmasa da xatırlamışam. Vəli kənd içərisində danışarkən guya anamla, bacımla cinsi əlaqədə olduğunu da demişdi. Bu haqda bibim oğlu Ramiz də mənimlə 4-5 il əvvəl danışmışdı. Bu, mənim özümdən çıxmağıma səbəb oldu. Qazax rayonuna qayıtmağı qərara aldım”.

“Münasibətin dəyişdiyini hiss etdim”

Raulun sözlərinə görə, İstanbuldan çıxaraq 25 dekabr 2020-ci ildə kəndə gəlib: “Qarapapaq kəndinə gəlməkdə məqsədim Vəli ilə görüşərək bu məsələni onunla danışmaq, bütün bu söz-söhbətlərə son qoymaq olub.

Yaşadığımız evi kirayə verdiyimiz üçün həmin kənddə nənəmin yanına getdim və orada qaldım. Kənddə olarkən həmkəndlilərimin davranışlarından Vəlinin haqqımda danışdığını, həmkəndlilərimin mənə münasibətinin dəyişdiyini hiss etdim”.

“Bibim oğlu ağzından qaçırdı...”

Raulun ifadəsinə görə, dekabrın 29-da gündüz saatlarında yaşadığı məhəlləyə gedib: “Həmin vaxt Vəlinin arvadı Səidə məni küçədə gördü, bildirdi ki, bizimkilər evdədir, gəl onlarla görüş. Mən də Vəlinin evinə getdim. Evdə Vəlinin arvadı Səidə, qayınatası, qaynanası olub. Təxminən yarım saat ümumi mövzuda söhbət etmişik.

Səidə ilə münasibətlərimiz həmişə yaxşı olub. Onu özümə bacı kimi görmüşəm. Axşam saatlarında isə bibim oğlu Ramizlə evlərində görüşərək birlikdə spirtli içki qəbul etdik. Söhbət zamanı Vəlinin dedikləri barədə söhbət açıldı. Ramizdən Vəlinin ailə üzvlərim, yəni anam və bacım haqqında nalayiq ifadələr işlədib-işlətmədiyini soruşdum.

Ramiz Vəlinin ailə üzvlərim haqqında nalayiq ifadələr işlətməsi, anam və bacımla cinsi əlaqədə olması barədə danışdığını ağzından qaçırdı. Bundan çox qəzəbləndim”.

“Qarşıma bacısı çıxdı”

Raul qeyd edib ki, gecə saat 1 radələrində Vəligilin evinə getməyi qərara alıb: “Darvazanın yanında hasara dırmaşdım və Səidənin yaşadığı evin həyətinə daxil oldum. Həyətə girməzdən əvvəl kurtkamı və ayaqqabımı darvazanın yaxınlığında çıxararaq dəmirə ilişdirdim. Evin ön hissəsinə keçərək birinci mərtəbədə olan otağa daxil oldum. Orada qarşıma Vəlinin bacısı çıxdı.

O mənə tez geri qayıtmağı tapşırdı, özü isə birinci mərtəbədəki otağa keçdi. Mən də oradan aralanaraq darvazaya tərəf getdim. Təxminən 5-7 dəqiqə gözlədikdən sonra ikinci mərtəbəyə qalxmaq fikrinə düşdüm.

Səidənin qayınatası, qaynanası mənim gəldiyimi eşitməsin deyə sakitcə yuxarı qalxdım və ikinci mərtəbədə olan qapını sakitcə döydüm”.

“Kişi olduğumu sübut edəcəyimi bildirdim”

Raul bildirib ki, məqsədi Vəlinin arvadı ilə cinsi əlaqədə olmaqla deyilənlərin əvəzində kişi olduğunu, homoseksual olmadığını kənd əhalisinə sübuta yetirmək olub: “İkinci mərtəbədə qapını döydüm, heç kim açmadı. Aşağı düşərək pilləkənlərin kənarında olan dəmirin üstünə çıxıb pəncərəni açmağa çalışdım. Pəncərəni itələyərək içəri daxil oldum. Səidənin yatdığı otağın yerini əvvəlcədən bilməmişəm.

İkinci mərtəbədə 3 otaqdan yalnız ortadakında qırmızı rəngli gecə işığının yanılı olduğunu gördüm, həmin otağa tərəf getdim. İçəri girəndə Səidənin döşəmədə açılmış döşəyin üzərində yatdığını gördüm. Onun yanına keçərək uzandım. Səidə yuxudan oyandı və məni gördü. “Sən burada nə edirsən, Raul?” dedi.

Səidənin ağzından tutaraq qışqırıb kömək çağırmasına imkan vermədim. Ərinin Rusiyadan gəlib-gəlmədiyini soruşdum. O, gəlmədiyini bildirdi. Səidəyə mənimlə cinsi əlaqədə olacağını, Vəliyə kişi olduğumu sübut edəcəyimi bildirdim. Səidə mənə müqavimət göstərmək istədi. Əlimlə onun bədəninə və sifətinə zərbələr vurdum ki, mane olmasın. Sonra şalvarımı aşağı çəkərək Səidə ilə cinsi əlaqədə olmaq istədim”.

“Paltarlarını çıxarmağa imkan vermədi”

Raul deyib ki, Səidə ona müqavimət göstərməyə çalışdığı üçün yorğan üzlüyü odun peçinə dəyərək müəyyən hissəsi yanıb: “Dərhal yorğan üzlüyünü söndürdüm. Səidənin əynində olan şortiki iki dəfə aşağı çəkməyə çalışdım, Səidə buna imkan vermədi. Əynində olan köynəyi qaldırmağa çalışsam da, buna da mane oldu.

Sərxoş olduğumdan daha da ehtiraslandım, Səidənin əynindəki koftanın boyun hissəsindən dartaraq cırmağa çalışdım. Onun boynundan və sifətindən öpməyə çalışdım. “Vəliyə hörmətin yoxdumu, bu nə hərəkətdir edirsən?” - dedi. Mən isə cavabımda “Vəlinin var-yoxunu...” - deyib nalayiq ifadələr işlətdim.

Bundan sonra Səidə otaqdan çıxaraq qaynatasını çağaracağını bildirdi. Səidənin paltarlarını çıxarmağıma imkan vermədiyini, otaqdan çıxaraq ailə üzvlərinə məlumat vermək üçün qaçdığını gördükdə onunla cinsi əlaqədə olmamağı, evdən çıxaraq qaçmağı qərara aldım.

Pəncərəyə vurulmuş ağ mələfəni aşağı çəkərək cırdım və pəncərəni açıb evdən qaçdım. Darvazanın yanına qoyduğum gödəkçəmi və ayaqqabılarımı götürüb nənəmgilə getdim”.

“Polis şöbəsinə gəldim”

Təqsirləndirilən şəxsin sözlərinə görə, həmin vaxt nənəsinin yaşadığı evin darvazası bağlı olub: “Buna görə hasardan tullanaraq həyətə düşdüm, evə gedib yatdım. Səhəri gün təxminən saat 9 radələrində evdən çıxdım və Qazax şəhərinə gəldim. Şəhərdə bazara getdim, müxtəlif yerlərdə gəzdim.

Mədəniyyət evinin yanında dükandan mobil telefon nömrəsi, 120 manata “Samsung” markalı mobil telefon aldım. Axşam saatlarında bibim oğlu Ramiz mənimlə əlaqə saxlayaraq polislər tərəfindən axtarıldığımı bildirdi. Təxminən saat 21 radələrində polis sahə rəisi ilə görüşdüm və birlikdə rayon polis şöbəsinə gəldim”.

Bu cinayət işinə Gəncə Ağır Cinayətlər Məhkəməsində baxılıb. Raul 4 il 6 ay müddətinə azadlıqdan məhrum edilib.