Amin Zərbaliyev, 17 iyul 2006-cı ildə Kürdəmir rayonunda anadan olmuş, 2012-ci ildə Cabbar Əsgərov adına Sığırlı kənd tam orta məktəbinin 1-ci sinifinə daxil olub. Məktəb dövründə göstərdiyi yüksək intellektual qabiliyyətlərlə fərqlənən Amin, rayon və region səviyyəli intellektual oyunlarda komandası ilə fəal iştirak etmiş, Respublika Fənn Müsabiqəsinin mükafatçısı və Coğrafiya üzrə Respublika Fənn Olimpiadalarının gümüş medalçısı olmuşdur. Məktəbi 2023-cü ildə əla qiymətlərlə bitirən Amin, UNEC Türk Dünyası İqtisadiyyatı fakültəsinə qəbul olunaraq, iqtisadiyyat sahəsində öz təhsilini davam etdirmişdir.

Aminin peşəkar həyatı da çox cəhətdən uğurla formalaşmışdır. 2023-cü ilin sentyabrında UNEC Tələbə Gənclər Təşkilatında koordinator və layihə meneceri vəzifəsində çalışmış, müxtəlif layihələrə rəhbərlik etmişdir. Eyni zamanda, 2023-cü ilin sonlarına doğru ASAN Xidmətin könüllü proqramlarını uğurla tamamlamışdır. 2024-cü ilin yazında isə Azərbaycan Respublikası Prezidenti Yanında Vətəndaşlara Xidmət və Sosial İnovasiyalar üzrə Dövlət Agentliyində Master 2 pilləsini başa vurmuşdur.

Bundan əlavə, 2024-cü ildə “Baku Zoo”da könüllü fəaliyyətini uğurla başa vuran Amin, Yeni Azərbaycan Partiyasının Səbail rayon təşkilatında təcrübə proqramını da müvəffəqiyyətlə tamamlamışdır. Eyni zamanda, YAP tərəfindən təşkil olunan “Biz Ümumili Lider Heydər Əliyevin Elmi-Siyasi İrsini Öyrənirik” adlı illik akademiyanı uğurla bitirmişdir.

2024-cü ildə beynəlxalq təcrübə əldə etmək üçün AIESEC-in Beynəlxalq Təcrübə Proqramına qatılan Amin, ölkəmizi 111 fərqli dünya ölkəsində təmsil etmiş, bu layihəni yüksək nailiyyətlə tamamlayaraq beynəlxalq dərəcəli sertifikat əldə etmişdir. Hazırda Statistika Komitəsində çalışan Amin, eyni zamanda UNEC Rəqəmsal Könüllülər Təşkilatında Sədr müavini kimi fəaliyyət göstərir.

Aminin əldə etdiyi uğurlar yalnız peşəkar sahədə deyil, həm də təhsildə özünü göstərir. UNEC EKO İDEA yarışında birinci yerə çıxaraq universitetini qürurlandırmışdır. Texno.TV xəbər texnoloji məlumat kanalını yaradan Amin, iqtisadiyyat sahəsində müxtəlif məqalələr də yazmışdır. Bunlar arasında “Azərbaycanın Xarici Ticarət İstiqamətləri”, “Yaşıl İqtisadiyyatın Sosial və Siyasi Təsiri”, “COP-29-un Qafqaz və Azərbaycanda Yaratdığı Təsirlər” və “İqlim Dəyişmələrinə Qarşı Mübarizədə Mühüm Platformalar” kimi əhəmiyyətli tədqiqatlar yer alır.

Amin Zərbaliyevin “Dünya İqtisadiyyatı” adlı kitabı 2025-ci ilin yanvarında çap olunmuşdur. Kitabın elmi redaktoru iqtisad üzrə fəlsəfə doktoru Maqsud Mirzəyev, elmi rəyçisi isə əməkdar müəllim Məhəmmədəli Rasulov olmuşdur. Amin Zərbaliyev, həmçinin Taylandda keçiriləcək “6th International Conference on Multidisciplinary and Current Educational Research (ICMCER-2025)” beynəlxalq konfransına dəvət alan yeganə tələbədir.

Aminin bir çox təşkilatlardan aldığı təltiflər arasında AİESEC-in Beynəlxalq Prezidenti Ana Fernandes, Kürdəmir rayon İcra Hakimiyyətinin başçısı Elxan İbrahimov, Elm və Təhsil Naziri Emin Əmrullayev və UNEC rektoru Ədalət Muradov kimi mühüm şəxslərdən aldığı təşəkkürnamələr xüsusi yer tutur.

Gənc bir tələbə olaraq Amin Zərbaliyev öz peşəkar və təhsil həyatında əldə etdiyi uğurlarla hər kəsə nümunə olmuş, Azərbaycanın gələcək yüksək səviyyəli mütəxəsislərindən biri olaraq öz yerini artıq müəyyən edib.