Mütəxəssislərin fikrincə, pomidorlar sağlamlığa bir çox müsbət təsir göstərən qidalar arasındadır və onları gündəlik rasiona daxil etmək orqanizm üçün müəyyən faydalar yarada bilər.
Xəbər verilir ki, bu barədə "RealSimple" yazıb.

Diyetoloq Ketrin Rozentalın sözlərinə görə, pomidorlar C vitamini, kalium, fol turşusu və K vitamini ilə zəngindir. Onların ən dəyərli komponentlərindən biri isə güclü antioksidant olan likopendir. Bu maddə qırmızı rəngin yaranmasına səbəb olur və orqanizmdə oksidativ stressi azaldaraq xroniki xəstəliklərin inkişaf riskini aşağı sala bilər.

Digər antioksidantlar – beta-karotin və xlorogen turşusu da pomidorun tərkibində yer alır. Beta-karotin A vitamininin ön maddəsi kimi immun sistemini və göz sağlamlığını dəstəkləyir. Xlorogen turşusunun isə qan şəkərinin tənzimlənməsinə və yüksək təzyiqin azaldılmasına kömək etdiyi bildirilir.

Mütəxəssislər qeyd edirlər ki, pomidorun müntəzəm istehlakı ürək sağlamlığına müsbət təsir göstərə bilər. Likopen iltihabı və oksidativ zədələnməni azaldır, kalium isə qan təzyiqinin tənzimlənməsinə kömək edir.

Araşdırmalara əsasən, pomidorların qida rasionuna daxil edilməsi bağırsaq mikroflorasının yaxşılaşmasına və faydalı bakteriyaların artmasına da təsir göstərə bilər. Ümumilikdə bu məhsul ürək-damar sistemini dəstəkləyir, iltihabı azaldır və həzm sisteminə müsbət təsir göstərir.

Bununla belə, bəzi hallarda ehtiyatlı olmaq tövsiyə olunur

Mütəxəssislərin fikrincə, pomidorlar turşu tərkibli olduğuna görə reflüks və ya mədə yanması problemi yaşayan insanlarda gündəlik istifadə narahatlıq yarada bilər. Belə hallarda ya istehlakı azaltmaq, ya da bişmiş və çiy pomidorun orqanizmə təsirini ayrıca müşahidə etmək tövsiyə olunur.

Jalə