“Gənclər və idman nazirliyində nazirliyin rəhbərliyinə daxil olan şəxslər arasında ciddi nüfuz savaşı müşahidə olunur. Əsasən nazir müavini Mariana Vasileva ilə nazirliyin Aparat rəhbəri Amil Xudiyev arasında ciddi fikir ayrılıqları var”.

Bu barədə informasiya Editor.az-a məlumatlı mənbələrdən daxil olub. İddialara görə, nazirliyin rəhbərliyi arasında fikir ayrılığına səbəb həyata keçirilən kadr siyasətidir: “Aparat rəhbəri Amil Xudiyev yerlərdə regional idarələrə təyin edilən kadrların doğru seçilmədiyini və onlarla işləməyin çətin olduğunu nazirlikdə keçirilən müxtəlif iclas və görüşlərdə dəfələrlə ifadə edib. O qeyd edib ki, kadr seçimindəki meyarlar ədalətli deyil və bu kadrlarla gənclər və idman siyasətində uğur əldə etmək mümkün deyil.

Gənclər və idman nazirliyində nüfuz savaşı?

A.Xudiyevin bu yanaşması kadr siyasətində həlledici rola malik nazir müavini Mariana Vasileva tərəfindən etirazla qarşılanıb. O həm nazirə, həm də digər müvafiq qurumlara Xudiyevdən şikayət edib. Mariana Vasileva ölkə rəhbərliyi tərəfindən təyin edildiyini və onun işinə müdaxilənin yolverilməz olduğunu qeyd edib. Yaranmış vəziyyət nazir Fərid Qayıbovu da çətin duruma salıb”.

Editor.az səslənən iddialarla bağlı Gənclər və İdman nazirliyinin də mövqeyini öyrənib. Gənclər və İdman Nazirliyinin Mətbuat xidmətinin rəhbəri Qabil Mehdiyev mövzu ilə bağlı Editor.az əməkdaşının sualını böyük aqresiya ilə qarşılayıb: “Kimsə hardansa ağlına gələn bir fikir söyləyəcək, biz ona cavab verməliyik? Bu başadüşülən sorğu deyilş, peşəkarlıqdan uzaq yanaşmadır. Nazirlikdə hər şey qaydasındadır, öz yolunda gedir. Nazirliyin fəaliyyəti, gənclər və idman siyasəti sahəsində görülən işlərlə bağlı sual verin, cavablandıraq”.

Editor.az