Abşeronda dələduzluqda təqsirləndirilən Türkiyə vətəndaşı Tosun Güngörün barəsindəki hökmdən kassasiya şikayəti verilib.

Məlumata görə, şikayət Ali Məhkəmənin hakimi Nazim Mövsümovun sədrliyi ilə araşdırılacaq

Məhkəmənin ilkin hazırlıq iclası dekabrın 27-nə təyin edilib.

Abşeron Rayon Məhkəməsinin hökmü ilə o, 3 il müddətinə azadlıqdan məhrumetmə cəzasına məhkum olunub. Hökmdən qeyd edilib ki, təqsirləndirilən şəxs cəzasını ümumi rejimli cəzaçəkmə müəssisəsində çəkəcək. Sumqayıt Apellyasiya Məhkəməsi onun şikayətini təmin etməyib.

İttihama görə, 1980-ci il təvəllüdlü Tosun Güngör tamah niyyəti ilə etibardan sui-istifadə etmə və aldatma yolu ilə özgənin əmlakını ələ keçirmək məqsədi ilə Mahirə Məmmədovanın (şərti) etibarından sui-istifadə edib. Belə ki, o, qadına Gürcüstandan “Audi” markalı avtomobil gətirəcəyinə yalandan vəd verib ondan 2019-cu ildə Abşeron rayonu, Masazır kəndi ərazisində ümumlikdə 12 000 manat və 3 000 ABŞ dolları (17 100 manat) məbləğində pulu dələduzluq yolu ilə ələ keçirilib. Daha sonra qadının şikayəti əsasında Tosun Güngör saxlanılıb və barəsində Cinayət Məcəlləsinin 178.2.4-cü (Dələduzluq, xeyli miqdarda ziyan vurmaqla törədildikdə) maddəsi ilə ittiham irəli sürülüb və məhkəmə qərarı ilə həbs qətimkan tədbiri seçilib. Məhkəmə baxışında Türkiyə vətəndaşı ona elan olunmuş ittiham üzrə özünü təqsirli bilməyib. O, ifadəsində göstərib ki, Mahirə Məmmədova ilə 2019-cu ilin təxminən iyun-iyul aylarında Bakı şəhərində yerləşən “Ramada” hoteldə tanış olub. Təqsirləndirilən şəxsin sözlərinə görə, qadınla təxminən 15 gün ərzində yaxın münasibətləri olub, həmin vaxt ərzində o, Mahirəyə kömək kimi təxminən 1500-2000 manat məbləğində pul verib: “Mahirə mənimlə evlənmək istədiyini, hətta Türkiyədə də yaşaya biləcəyini bildirdi. Daha sonra qadın məni şantaj etməyə başladı, hətta bir dəfə o, Bakı şəhərində yaşadığım evə gəldi, aramızda mübahimiz oldu. Bununla bağlı Xətai Rayon Polis İdarəsinin 3-cü Polis Bölməsində araşdırma aparıldı. Mən zərərçəkmiş şəxsdən avtomobil gətirmək adı ilə pul almamışam. Bakıda avtomobil təmiri ilə məşğul oluram, 2020-ci ilin noyabr və dekabr aylarında avtomobil ehtiyat hissələrini gətirmək üçün Gürcüstana getmişəm”.

Kamal Məmmədov