Milli Azərbaycan Tarixi Muzeyində “Heydər Əliyev İli” çərçivəsində silsilə tədbirlərə start verilib. Azərbaycan Respublikasında 2023-cü ilin “Heydər Əliyev İli” elan edilməsi ilə əlaqədar Muzeydə Ulu Öndər Heydər Əliyevin 100 illik yubileyinə həsr olunmuş “Heydər Əliyev - Azərbaycan mədəniyyətinin ən böyük himayədarı” adlı müsabiqə-sərgi keçirilib.
Tədbirdə “2 saylı Uşaq-Gənclər İnkişaf Mərkəzi” Publik Hüquqi Şəxsin Təşkilati kütləvi şöbənin müdiri Könül Qarəhmədova və dərnək rəhbərləri – Hüseynbala Qasımov, Cəmilə İsmayılova, Zülfiyyə Beydullayeva, eləcə də AMK İncəsənət Gimnaziyasının şagirdləri, gənc rəssamlar, incəsənət xadimləri, muzey əməkdaşları və media nümayəndələri iştirak edib.
Tədbirin keçirilməsində əsas məqsəd müstəqil Azərbaycanın qurucusu, Azərbaycan xalqının xilaskarı Ulu Öndər Heydər Əliyevin keçdiyi şərəfli yolu və müstəqillik tariximizi uşaqlara əyani aşılamaq və onların bunu əl işlərində əks etdirmələridir. Müsabiqə-sərginin kuratoru muzeyin əməkdaşı Aynur Babayevadır.
Burada 2 saylı “Uşaq-Gənclər İnkişaf Mərkəzi” PHŞ və AMK İncəsənət Gimnaziyasının istedadlı şagirdlərinin Azərbaycanın əbədiyaşar lideri Heyər Əliyevi və müstəqil Azərbaycan tarixini əks etdirən 30-a yaxın kreativ rəsm əsəri və əl işləri yer almışdır.
Tədbirin açılışı Azərbaycan himninin səsləndirilməsi ilə başlayıb. Sonra Ulu Öndər Heydər Əliyevin və ölkəmizin ərazi bütövlüyü uğrunda canından keçmiş şəhidlərimizin əziz xatirəsi bir dəqiqəlik sükutla yad edilib.
Tədbiri giriş nitqi ilə Muzeyin Elmi işlər üzrə direktor müavini, tarix üzrə elmlər doktoru Fərhad Cabbarov açaraq iştirakçıları salamlayıb, tədbirin əhəmiyyəti və Heydər Əliyevin mədəniyyətimizin inkişafındakı xidmətlərindən bəhs edib. F.Cabbarov qeyd edib ki, Ümummilli Lider Heydər Əliyevin 100 illiyi ilə əlaqədar muzeydə, yaxud muzeydənkənar mütəmadi maarifləndirici tədbirlər keçirilir.
Sonra İnnovasiyalar və təhsil proqramları şöbəsinin baş mütəxəssisi Aynur Babayeva çıxış edərək fotoslayd nümayişi ilə Heydər Əliyevin Azərbaycan muzeylərinin inkişafındakı rolu və müsabiqə haqqında iştirakçılara ətraflı məlumat verib. Daha sonra zalda iştirakçılar Heydər Əliyevin çıxışının və onun fəaliyyəti ilə bağlı videoçarxı izləyiblər.
Tədbirdə İncəsənət Gimnaziyasının balaca ifaçısı Mətləb Əhmədzadə Heydər Əliyevə həsr olunmuş musiqi nömrəsi ilə çıxış edib.
Onu da qeyd edək ki, tədbirdə dəyərli incəsənət xadimlərindən ibarət Münsiflər Heyətinin üzvləri iştirak ediblər: Əməkdar incəsənət xadimi, "Sənətşünaslığın təbliği" İctimai Birliyinin sədri, sənətşünaslıq üzrə fəlsəfə doktoru, professor Ziyadxan Əliyev, Azərbaycan Rəssamlar İttifaqının sədr müavini, Azərbaycan Respublikasının xalq rəssamı, professor Ağaəli İbrahimov, Azərbaycan Dövlət Rəssamlıq Akademiyası nəzdində İncəsənət Kollecinin direktoru Nigar Quluzadə, Milli Azərbaycan Tarixi Muzeyinin Təsviri İncəsənət Fondunun müdiri, memarlıq üzrə fəlsəfə doktoru Nardanə Yusifova, Milli Azərbaycan Tarixi Muzeyinin Bərpa laboratoriyasının bərpaçı-rəssamı, Azərbaycan Respublikasının əməkdar mədəniyyət işçisi, sənətşünas Gülşən Hacıyeva.
Münsiflər Heyəti və iştirakçılar rəsm əsərləri, əl işləri ilə yaxından tanış olublar. Təqdim olunmuş işlər haqqında müzakirələrdən sonra Münsiflər heyəti 3 nəfər qalib seçib və 4 nəfərə həvəsləndirici yerlər veriblər.

Hüseynbala Həsən
/atributinfo.az/