Yeni il gecəsində İstanbulun "Reina" gecə klubunu qana bulayan terrorçuyla bağlı yeni ipucları ortaya çıxır

Başakşehirdə bir mənzildə qalan terrorçunun o gecə Zeytinburnunda bir görüş sonrası Ortaköyə getdiyi, terrordan sonra da 4 taksi dəyişdirib, yenidən Zeytinburnuna döndüyü müəyyən edilib.

Milli.Az Milliyet-ə istinadən xəbər verir ki, İŞİD-ə işarə edən ilk məlumatların ardından yeni ipucları əldə edilməyə başlanılıb.

İstintaq çərçivəsində İstanbul Təhlükəsizlik İdrəsi Terrorla Mübarizə şöbəsində yaradılan kamera izləmə qrupu kod adı "Əbu Məhəmməd Xorasani" olan, ancaq əsl adı hələ dəqiqləşdirilməyən terrorçunun şəhərdə hərəkət müddətini ortaya çıxarıb.

Terror sonrası 4 dəfə taksi dəyişdirən terrorçu əvvəl "Reina"dan 5 dəqiqəlik məsafədə yerləşən ərazidə avtomobildən enib, gecəqonduların arasıyla sahilə doğru hadisə yerindən uzaqlaşıb. Ardından "Zincirlikuyu" metro stansiyasına gələn terrorçu sonda Zeytinburnu Muratpaşadakı bir kafeyə daxil olub. "Əbu Məhəmməd Xorasani" gecəni bu kafedə keçirib.

Polis buraya qədər terrorçunun hərəkət istiqamətini müəyyən edib. Ancaq ertəsi gün terrorçu izi itirməyi bacarıb.



Səhər saat 10 radələrində kafedən çıxan terrorçu şəxsiyyəti təyin edilməyən bir şəxslə kafe qarşısında görüşüb. Sonra onların yanına üçüncü naməlum şəxs də bir avtomobillə gəlib. Terrorçu həmin an birinci görüşdüyü şəxsdən ayrılıb, avtomobillə gələn adamla birlikdə avtomobilə minib izini itirib.

Mobil telefonundakı ad

Bu vaxt polis "Əbu Məhəmməd Xorasani"nin istifadə etdiyi mobil telefonundakı məlumatları əldə edə bilib. Telefon qeydlərində edilən araşdırmada tanış bir ismə rast gəlinib. Bu ad, "Tacik İlyas" kod adını istifadə edən Məhəmməd Kərimdi. Özbək mənşəli Məhəmməd Kərim dekabr ayının əvvəlində İstanbul Polis İdarəsi tərəfindən saxlanılmışdı.

Telefondakı digər bir qeydin isə İŞİD daxilində əhəmiyyətli bir şəxs hesab edilən və yalnız "Müəllim Aka" kod adından istifadə edən şəxsin köməkçisi, "Yusuf" kod adlı İlyas Mamaşaripov olduğu təyin olunub. İlyas Mamaşaripov İstanbul Polis İdarəsi tərəfindən Ortaköy terrorundan sonra saxlanılıb.

Mamaşaripovun etdiyi ilk açıqlamada "Reina"nı qana bulayan terrorçunun kod adı ortaya çıxıb. Məlum olub ki, o, ərəb, rus və özbək dilində danışmağı bacarır.

İstintaq çərçivəsində əhəmiyyətli bir məlumat da əldə edilib. Polisin araşdırması nəticəsində terrorçu "Əbu Məhəmməd Xorasani"nin bir müddət Pakistanın Livara şəhərində yaşadığı ortaya çıxıb. Oradan İrana keçib. İranda tutulan terrorçu bir müddət sonra həbsdən qaçmağı bacarıb. "Xorasani" daha sonra qaçaqmalçıların köməyilə Ağrı tərəfdən qeyri-qanuni yolla Türkiyəyə daxil olub.




İstanbulda bir müddət Sefaköydə yaşadığı bildirilən terrorçunun eyni zamanda İŞİD-lə əlaqəli olan şəxslərə dərs keçdiyi bildirilir. Xarici əsilli şəxslərin də qatıldığı ifadə edilən bu dərslər üçün WhatsApp və Telegram vasitəsi ilə qruplar yaratdıqları da deyilir.

Qanlı gecədən sonra terrorçunun yoxa çıxması böyük müzakirələrə səbəb olub.

Daxili işlər naziri Süleyman Soylu və ümumi təhlükəsizlik naziri Selami Altınok istintaq prosesini çox yaxından izləyirlər.