Deputat, Mətbuat Şurasının sədri Əflatun Amaşov Milli Məclisin bu gün keçirilən plenar iclasında 2019-cu il üçün dövlət büdcəsi ilə bağlı müzakirələrdə çıxış etdi.

O bildirdi ki, 2019-cu ilin dövlət büdcəsində keçən ilə nisbətən artım var: “Bu, təhsilə, səhiyyəyə və digər sahələrə ayrılmış vəsaitlərin miqdarında özünü göstərir. Müsbət haldır. Əminəm ki, ölkəmizin inkişafı imkan verəcək ki, əhəmiyyətli artım bütün sahələri əhatə etsin. Eyni zamanda onu da nəzərə alaq ki, büdcə layihəsinin özü də kifayət qədər təkmil hazırlanıb. Bunda əməyi keçən hər kəsə təşəkkürümü bildirirəm”.

Ə.Amaşov son zamanlar kənd təsəsrrüfatının inkişafı ilə bağlı ciddi işlərin görüldüyünü bildirdi. Eyni zamanda seçicilərinin problemlərini qaldırdı: “Deputat seçildiyim Saatlı rayonunda da bunun şahidi oluruq. Keçən il 17 min hektar sahədə yalnız pambıq əkilmişdi. Bu da minlərlə insanın iş yeri ilə təmin olunması və rifahının yaxşılaşması deməkdir. Çox təəssüf ki, əkilən sahələrin bir hissəsinin suvarılması mümkün olmadığından bu, məhsuldarlığa mənfi təsir göstərdi. Habelə bəzi yerlərdə payız əkininin belə suvarılması mümkün olmadı. Araz çayının suvarma potensialı çox zəifdir. Seçicilərlə görüşərkən onlar dəfələrlə su problemini qaldırıblar. Hörmətli baş nazirimiz cənab Novruz Məmmədov buradadır. Onun da diqqətinə bu məsələni çatdırmaq istəyirəm. Əgər biz ümumən Muğan bölgəsində kənd təsərrüfanının inkişafını, yüksək məhsuldarlığı istəyiriksə, mütləq əraziyə Kür çayından su kanalı çəkməliyik. Mütəxəssislərin hesablamalarına görə, həmin kanalın uzunluğu 16-17 kilometr ola bilər. Məncə, bu işin başa gəlməsi elə də böyük vəsait tələb etməz. Ancaq bu kanalın sayəsində çox böyük ərazi kənd təsərrüfatı üçün münbit zonaya çevrilər”.

Mətbuatın problemlərinə diqqət çəkən Ə.Amaşov dedi ki, önəmli məsələlərdən biri media, əsasən də onlayn mediadır: “Maliyyə naziri cənab Samir Şərifova təşəkkür edirəm ki, komitə iclaslarında qaldırdığım bu məsələyə reaksiya verdi. Əminəm ki, məsələnin əhəmiyyətlilik dərəcəsinə adekvat yanaşma var. Bunu müsbət qiymətləndirirəm. Digər bir məsələ hazır çap məhsullarına və qəzet kağızına tətbiq edilən əlavə dəyər vergisi ilə bağlıdır. Baxın, büdcəmiz artır, əvvəlki illərdəki durğunluq demək olar, tam aradan qalxıb. Bu durumda məsələnin mahiyyətinə daha dərindən diqqət yetirək. Bəli, müqayisəli yanaşsaq, mediamızın iqtisadi durumu problemsiz deyil. Konkret rəqəmlər var, bu barədə çox danışmaq istəmirəm. Biz nəyə görə mediamızı əlavə yükdən qurtarmayaq? Bir halda ki, ƏDV-nin tətbiqindən dövlət büdcəsinə elə də böyük vəsait daxil olmur: təqribən yarım milyon manat. Hazır çap məhsullarını da götürək. Bunların əsas qismi ölkəmizə kənardan gəlir. Nəyə görə onların qiyməti baha olmalıdır? Biz cəmiyyətn maariflənməsini, qabaqcıl elmi biliklərə yiyələnməsini istəməliyik. Axı, müasir dünyada bu yolun alternativi yoxdur”.

E.PAŞASOY,
Musavat.com