““Əqrəb mövsümü” serialında müəlliflər cəsarət edib, çox mühüm problemi - məhkəmə sisteminin acınacaqlı vəziyyətdə olmasını gündəmə gətiriblərsə, bunu vəkillər vasitəsilə açıb ortaya qoyublarsa, İctimai TV-yə də, filmin heyətinə də min dəfə təşəkkür edirəm. Vəkillər özləri etiraf etmirlər ki, onları saya salan yoxdur? Məsələnin, sadəcə, əyani surətdə görüntüsünü həll edirlər. Beynəlxalq aləmdə olan vəkillər nazirləri divara dirəyib, haqqı bərpa edirlər. Bizdə belə vəkil var? Vəkillər sevinməlidirlər ki, nəhayət, bunlar haqqında əsl həqiqətləri deyən oldu. Nədən narahatdırlar?”

Bu sözləri Pravda.az-a açıqlamasında Xalq artisti Əbdül Mahmudov (Şeyx Əbdül) deyib.

“Dahi Mirzə Ələkbər Sabir deyib ki, “Niyə bəs böylə bərəldirsən, a qare, gözünü? Yoxsa bu ayinədə əyri görürsən özünü?!” Aynaları niyə sındırırsınız? Gedin, sizi bu günə qoyan prokurora, məhkəmə sisteminə qarşı çıxın. Azərbaycanda hansı vəkil prokurorun, məhkəmənin təziyiqi olmayan yerdə məsələni həll edə bilib? Nümunə göstərsinlər, deyim ki, sağ ol. Namuslu, qeyrətli, iş görmək istəyən vəkillər az deyil. Amma heç bir işi həll edə bilmirlər. Sadəcə, qaynayan qazanın qapağını açırlar, ya da yaranın qaysağını qoparırlar. Məhkəmə sisteminin ən böyük qurbanlarından biri elə mənəm. Azərbaycanın Xalq artisti, dövlət mükafatı laureatı, Əməkdar incəsənət xadimi... Əlimdə üç dənə məhkəmə qətnaməsi var. Rayon, Apellyasiya və Ali Məhkəmə. Məhkəmənin qərarını kağız yerinə sayan yoxdur. Hacıbala Abutalıbov dedi ki, bunlar mənim üçün mənasız kağız parçasıdır, cırıb zibil qutularına tullayıram. Hacıbala sağ, mən sağ. Faktla danışıram - “krişada” yaşayan Xalq artisti... Vəkil nədən narahatdır? Heç mənə vəkil də lazım olmadı. Sevinin ki, probleminizi İctimai TV-də ictimailəşdirirlər. Özünüz danışa bilmirsiniz, heç olmasa serialda həqiqətləri açıb göstərirlər də”, - o bildirib.

Aytəkin Qardaşova