Hər gün olduğu kimi, bu gün də dövlət satınalma portalında 10-larla tender müqaviləsi barəsində məlumat yer alıb və onlardan bir neçəsinin - Azərbaycan Respublikasının Prezidenti yanında Vətəndaşlara Xidmət və Sosial İnnovasiyalar Üzrə Dövlət Agentliyi ilə "Deepfive" MMC, Bakı Sağlamlıq Mərkəzi ilə"Kommunal Xidmətlər Müəssisəsi" MMC və "Y.A.P.D."MMC arasında, Maliyyə Nazirliyi Yanında Maliyyə Elm-Tədris Mərkəzi ilə "tender fəalı" "Sınam" MMC arasında, "Akademik M.Ə. Mirqasımov adına Respublika Klinik Xəstəxanası" Publik Hüquqi Şəxsi ilə "Azərbaycan Metrologiya İnstitutu " Publik Hüquqi Şəxsi arasında , "Masallı Rayon Mərkəzi Xəstəxanası" Publik Hüquqi Şəxsi, "Cəlilabad rayon Mərkəzi Xəstəxanası" Publik Hüquqi Şəxsi və "Şirvan Şəhər Mərkəzi Xəstəxanası " Publik Hüquqi Şəxsi ilə "Frekans Construction and Energy Company" MMC arasında bağlanan müqavilələr və digər bağlanan bir çox müqavilələr barəsində ətraflı məlumat bölməsi ümumiyyətlə boş saxlanılıb ki, bu da toplumda milyonlarla manat məbləğin taleyinin sual altında olmasının göstəricisidir.

Bağlanan müqavilələr arasında daha çox diqqət cəlb edən bir gündə 3 rayonun mərkəzi xəstəxanası ilə müxtəlif məbləğlərdə - "Masallı rayon Mərkəzi Xəstəxanası" Publik hüquqi şəxsi ilə "əsas fondlara xidmət haqqı" üçün 10.761,6 (on min yeddi yüz altmış bir, altmış) AZN, 3 mərtəbəli "Cəlilabad Rayon Mərkəzi Xəstəxanası" Publik Hüquqi Şəxsi ilə "Liftlərə servis xidmətinin satınalınması" üçün 16.299, 58 (on altı min iki yüz doxsan doqquz, əlli səkkiz) AZN, 4 mərtəbəli "Şirvan Şəhər Mərkəzi Xəstəxanası" Publik Hüquqi Şəxsi ilə isə "liftlərə aylıq servis xidməti" üçün isə 7.788 (yeddi min yeddi yüz səksən səkkiz) manat məbləğin xərclənəcəyi qeyd olunub.

Qeyd edək ki, "servis" sözü Azərbaycan dilinə tərcümədə "xidmət" deməkdir. Maraqlıdır ki, yeni direktorunu təzəcə qarşılamış Şirvan şəhər mərkəzi xəstəxanasının, haqqındakı məlumatlar "sirr saxlanılan" tender müqaviləsində xidmətin adında "servis xidməti" sözü yer alır. Üstəlik də, bir gündə 3 xəstəxananın güya elan etdiyi tenderlərin hamısının "qalibi olan" və bunlardan ikisi barəsindəki məlumatları ictimaiyyətdən "gizlədən" "Frekans Construction and Energy Company" MMC -nin nə fəaliyyəti barəsində, nə şirkətin özü haqqında internet üzərindən heç bir məlumat tapa bilmədik.

Nizamnamə kapitalı cəmi 10 manat olan bu MMC 2009-cu ildə yaranıb. Əvvəlki hüquqi ünvanı Yasamal rayonu Ələsgər Ələkbərov küçəsi ev 93 olub, hüquqi şəxs Ömərov Qüdrət Bayram oğlu rəhbərliyi ilə 2023-cü ilin noyabr ayına qədər "Şəhərgah" MMC adı ilə, 2023-cü ilin noyabr ayından isə dəyişdirilərək, adı "Frekans Construction and Energy Company" MMC olub, hüquqi ünvanı Xətai rayonu Məhəmməd Hadi küçəsi ev 23 m, 137, hüquqi şəxs isə Məsimov Adil Bəhlul oğlu olub.

Hüquqi şəxslərin də hər ikisi barəsində heç bir məlumata rast gəlmədik. Lakin, internet üzərindən haqqında heç bir məlumatın olmadığı bu MMC-nin adı isə yarandığı vaxtdan bu vaxta qədər yalnız yüzlərlə müxtəlif tenderlərin qalibi kimi satınalma portalında tez-tez qeyd olunub.

Yeri gəlmişkən, biz bu barədə məlumat almaq üçün adları çəkilən xəstəxanaların üçünün də xidmət nömrələri ilə əlaqə saxlamağa çalışdıq, dəstəyi qaldıran olmadı.

Xatırladaq ki, "Şirvan şəhər Mərkəzi Xəstəxanası" Publik Hüquqi Şəxsinin direktoru Pərviz Rüstəmbəyov 3 avqust 2023-cü il tarixində bu vəzifəyə təyinat alıb. Təyinata qədər isə TƏBİB -in ixtisaslı tibbi yardım departamentində ixtisaslaşmış tibbi yardım xidmətinin təşkili şöbəsinin baş mütəxəssisi vəzifəsində çalışıb.