Azərbaycanda COVID-19 (Omicron) virusuna yoluxma sayı 6 minlik psixoloji həddi keçdi. Əslində, “Omicron” virusunun yoluxma tezliyini nəzərə alsaq, bu, gözlənilən idi.

“Ölkə.Az” xəbər verir ki, bunu Milli Məclisin deputatı Vüqar Bayramov iqtisadi sektorda yenidən qapanmalara gedilib-gedilməyəcəyi ilə bağlı danışarkən deyib. O bildirib ki, son günlər qonşu ölkələrdə də yoluxma sayında ciddi artımlar müşahidə olunur:

“Dünən Rusiyada 141,883 min, Türkiyədə 110,682 min, Gürcüstanda 26,320 min virusa yoluxma olub. ABŞ və Fransada isə gündəlik yoluxma sayı 300 mindən çoxdur. Bütövlükdə, dünən dünyada 3 milyondan çox insanda virus aşkar olunub. Göründüyü kimi, əksər ölkələrdə yoluxma sayları rekord səviyyədədir. Buna rəğmən, artıq bir sıra ölkələr karantin rejiminin ləğv edilməsi və ya tamamən yumşaldılması kimi qərarlar qəbul edirlər. Bu isə ondan xəbər verir ki, dünya sərt karantinlərdən, yumşaq desək, bezib. Buna görə də, ölkələr “lock down” qərarlarının qəbulunda ehtiyatlıdırlar”.

Millət vəkilinin sözlərinə görə, Azərbaycan yumşaq karantin rejimini tətbiq edən ölkələrdəndir: “Omicron” virusunun yayılma dairəsinin geniş olmasına baxmayaraq, indiki halda yenidən sərt qapanmalara getmək arzuolunan deyil. Real sektordakı açılımların və yenidən bərpa olunan aktivliyin qorunub saxlanması vacibdir. Xidmət, ictimai iaşə və turizm kimi sektorlarda aktivlik artıq bərpa olunur və 2022-ci ildə daha geniş dövriyyə hədəflənir”.

“Bu baxımdan, sərt karantin tədbirlərinin tətbiqi deyil, hər birimizin virusdan qorunmaqla bağlı qaydalara tam əməl etməyimiz daha azruolunandır. Sərt karantin iqtisadi aktivliyi məhdudlaşdırdığı üçün məqsədəuyğun hesab olunmur”, - deyə V. Bayramov əlavə edib.