Rusiyada özünü "Kişi dövləti”nin qurucusu adlandıran Vladislav Pozdnyakov saxlanılıb. virtualaz.org Rusiya mənbələrinə istinadən xəbər verir ki, onu Azərbaycan sərhədini keçərkən tutublar. Bu haqda məlumatın mənbəyi "Pozdnyakov” Telegram-kanalının inzibatçılarından biridir.

"Bundan artıq informasiya verə bilmərəm. Nəsə məlum olsa biz burada dərc edəcəyik”,-məlumatda deyilir.

Pozdnyakovun Azərbaycanla sərhədin məhz hansı sahəsində saxlanıldığı göstərilmir, amma onun saxlanılmasının mümkün səbəblərindən biri telefon terrorçuluğu ittihamı ola bilər. Bu haqda lenta.ru hüquq-mühafizə orqanlarındakı mənbələrə istinadən bildirir. Mənbələr deyiblər ki, Pozdnyakov barədə "Tanuki” restoranlar şəbəkəsinin nümayəndələri polisə şikayət ərizəsi veriblər. Onlar hesab edirlər ki, "Tanuki” restoranlarına bomba qoyulması barədə yalan məlumatın verilməsinin mənbəyi məhz Pozdnyakov ola bilər.

Bu məlumat Federal Təhlükəsizlik Xidmətinə avqustun 30-da daxil olub. Məlumatda deyilirdi ki, bütün "Tanuki” restoranlarına partlayıcı qoyulub. Məlumat "Mariya Pavlova” adında istifadəçinin elektron poçtundan daxil olmuşdu.

Bundan əvvəl isə Pozdnyakov "Tanuki” restoranlar şəbəkəsinin sosial şəbəkə hesablarından bütün qaradərili modellərin fotolarının və LGBT simvollarının silinməsini tələb edib. Habelə restoranlar şəbəkəsinə süni şəkildə elektron sifarişlər yağdırılıb, şirkətin saytı çöküb, şirkət məcbur olub ki, nəğd hesablaşmanı dayandırsın. "Tanuki” rəhbərliyi Pavel Durovdan və "Roskomnadzor”dan Telegram-dakı "Kişi dövləti” hesabını bağlamağı xahiş edib.

"Kişi dövləti” Vladislav Pozdnyakov tərəfindən 2016-cı ildə "Vkontakte” sosial şəbəkəsində qapalı qrup şəklində yaradılıb. Qeydiyyata alınmayan və patriarxat, millətçilik ideyalarını təbliğ edən hərəkatdır. Fəaliyyəti əsasən internet mühitində qurulub. Qrup qadınları təhdid və təqib edir, onların sosial şəbəkə hesablarına hücum edir, LGBT nümayəndələrini qısnayır. 2020-ci ildə "Vkontakte” administrasiyası "Kişi dövləti”ni bağlayıb. Daha sonra ekstremist qruplaşma Telegram-a keçib.

2018-ci ildə Pozdnyakov qadınlara qarşı təhqiramiz hərəkətlərinə görə 2 il şərti həbs cəzası alıb, 2019-cu ildə hərəkatın 4 üzvü ekstremist fəaliyyətə görə məhkum edilib. Pozdnyakovun Telegram-kanalının 80 minə yaxın izləyicisi var.