azia.az
azia.az

Təqaüdə göndərilən hakim DSMF-ni məhkəməyə verdi

8-08-2019, 08:58


Ənvər Seyidov hesab edir ki, onun pensiyası düzgün hesablanmayıb
Ölkəni silkələyən cinayətlərə imza atmış bir qurumun sabiq şefi Eldar Mahmudova mədhiyyə məktubları yazan Ənvər Seyidov təqaüdünün azlığından narazıdır.
Təqaüdə göndərilən hakim DSMF-ni məhkəməyə verdi
Bakı Ağır Cinayətlər Məhkəməsinin hakimi postundan təqaüdə göndərilən Ənvər Seyidov Əmək və Əhalinin Sosial Müdafiə Nazirliyinin tabeliyindəki Dövlət Sosial Müdafiə Fondunu məhkəməyə verib. Hesab edir ki, onun pensiyası düzgün hesablanmayıb. Bu ilin martında onun 70 yaşı tamam olandan sonra hakimlik fəaliyyətinə xitam verilib. Ənvər Seyidov işdən çıxandan sonra pensiyasının çox artacağını gözləyib. Amma gözlədiyi kimi olmayıb. Ona görə fondu məhkəməyə verib.

Ənvər Seyidovun adı daha çox yaddaşlara sifarişli hökmlərə imzası atması, ittiham üzrə günahsız olduqlarını bildiyi insanları həbsə yollaması ilə qalıb. Məlumatda deyilir ki, məşhur hakimin iddiasına hələlik baxılıb qərar çıxarılmayıb. Ə.Seyidovun son iş yeri Bakı Ağır Cinayətlər Məhkəməsi olub. O, əvvəllər Zaqatala və Cəlilabad rayon məhkəmələrinin hakimi, Cəlilabad Rayon Məhkəməsinin sədri vəzifəsində də işləyib.

2015-ci ildə üzə çıxan məlum məktubunu Ənvər Seyidov “Səid Dadaşbəylinin dəstəsi” işi kimi mediada tirajlanan cinayət işi ilə əlaqəli Eldar Mahmudova imzalamışdı. Həmin məktubunda Ə.Seyidov saxtalığına kimsənin şübhə etmədiyi ittihama əsaslanaraq 16 Azərbaycan gəncini, savadlı və ölkəni xaricdə təmsil etmək iqtidarında olan vətəndaşları həbsə yollamasını yazır, gəncləri həbsə alan Antiterror Mərkəzinin rəhbərliyi də daxil olmaqla, əməkdaşların mükafatlandırılmasını istəyirdi. Halbuki hakimin belə bir məktub yazması qanunda nəzərdə tutulmayıb. Əslində Ənvər Seyidov Eldar Mahmudova gəncləri qanunsuz həbs edərək işgəncələrə məruz qoymuş əlaltılarının cəzalandırılması, gələcəkdə belə halların qarşısının alınması üçün məktub yazmalı, prokurorluğa isə cinayət işi başlanması üçün təqdimat göndərməli idi. Ötən illər həmin gənclərin valideynləri üçün dəhşətli olmaqla yanaşı, bir çoxları üçün də faciəvi oldu - ən müxtəlif xəstəliklər tapıb dünyadan köçdülər. Ənvər Seyidov isə sağdır və təqaüdünün azlığı onu qane etmir...

E.MƏMMƏDƏLİYEV,


OXŞAR XƏBƏRLƏR
XƏBƏR LENTİ
BÜTÜN XƏBƏRLƏR

MARAQLI
TƏQVİM
«    Avqust 2019    »
BeÇaÇCaCŞB
 1234
567891011
12131415161718
19202122232425
262728293031 
MƏZƏNNƏ
 Valyuta məzənnəsi